عقب العصر قبل المسلمين يمسون

لـ خالد بن عبدالعزيز التميمي، ، في الرثاء، آخر تحديث

عقب العصر قبل المسلمين يمسون - خالد بن عبدالعزيز التميمي

بسم الله الرحمن الرحيم
عقب العصر قبل المسلمين يمسون

جاني من الجوال علم حزيني
عمك توفى قلت ياناس وش لون

ماني مصدق علم عمي يجيني
ماني مصدق ياعرب وش تقولون

قالوا ترا للموت وقت يحيني
ابو محمد مات والعلم مضمون

صار الخبر في موت عمي يقيني
يومن سمعته صرت ضايق ومحزون

والقلب جض وهلت الدمع عيني
انا اشهد اني عقب فرقاه مغبون

كثر البكا بيح خفاي وكنيني
أبكي وغيري عقب فرقاه يبكون

اللي على موته تجر الونيني
اللي توفى والخلايق يصومون

جاه القدر صايم مع الصايميني
ابومحمد يوم الأثنين مدفون

الغالي اللي وسط قبره دفيني
مرحوم ياشيخ به الخير مقرون

متمسك بالخير دنيا وديني
شيخ عن الزلات والعيب مصيون

سمح جنابه والملا عارفيني
كريم طبع ومن تنصاه له عون

دوم على ضيم الليالي عويني
تلقاه مع ربعه على العسر والهون

فزاع للمحتاج في كل حيني
جيران بيته راح مامنه يشكون

طبعه يعاملهم بلطف وليني
رجل عرف بالطيب والناس يدرون

لين ارتفع ذكره مع الطيبيني
والله ماننسى لو الناس ينسون

ذكره يبي يبقى طوال السنيني
واليوم ابدعي خالق الخلق والكون

وللواحد المعبود برفع يديني
يرحم غريب بين الألحاد مكفون

اللي وحيد ووسط قبره سجيني
عمي عسى قبره بساتين وعيون

ويثبته ربه مع الثابتيني
ويغفر ذنوبه يوم داين ومديون

ويجزاه بالجنة مع الفايزيني
واختامهاواعداد ماتمطرمزون

واعداد ماتظهرنجوم وتبيني
صلوا على اللي بين الحق مليون

محمد المبعوث للعالميني
خالد

في 1441/9/12هجري

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2022 - موقع الشعر