تغنّت طيور الشعر في روضة البستان
تغرّد طرب وانا جذبني تغردها
جذبني صدى صوته على الحاجر المليان
يطوّّّّح مواويل(ن)على البال ارددها
تهيّض وهيّضني شجا وحرّك الاشجان
يداعب شعور الشعر كنه يعاندها
وجته القوافي مطلقات(ن)بدون اعنان
مطرّز معانيهن بصافي زمردها
تجاوبت انا والورق في ملتقى الخلان
مكان(ن)اليا جيته همومي يبددها
مكان(ن)نقش في داخل الذاكره عنوان
يذكّر عليّ عهودها يوم اعاهدها
سقاه الحيا من هامل الديم له ودّان
يربّع بروضه والمأثر يجددها
لجل كد مشى في روضته قايد العزلان
فريد(ن)فرد بالزين والرب فاردها
غريبه وصوفه ماوصوفه وصوف انسان
من الحور جلّ اللي عن الخلق زايدها
كساه الحلا والملح والنور فيه الوان
ملاك(ن) ملك نفسي عن الغير قيّدها
غرير(ن)غرور مغطرس(ن)بالجهل غرقان
قريب(ن)بعيد(ن)عن هل اللعب مبعدها
نظيف(ن)عفيف(ن) ماقضى للمولع شان
تموت النفوس من العطش مايشهّدها
محافظ على عهده مهو للعده خوّان
هواها على وضح النقا ذي عوايدها
اخذنا بماض الوقت انا والغضي عبّان
قبل لايفرقنا حسودي وحاسدها
تجدد عهود الود غصبن عن الزعلان
وتبرا قلوب(ن) كايد الود ضاهدها
وتطيب النفوس اللي طواها نيا الحرمان
توارا الزمان ولانفعها تجلّدها
قلوب(ن) تساعر وسطها واهج الضيّان
تقل بالخناجر والهنادي تقددها
حرمها عن اللي تشتهي ميّت الوجدان
حرمها حرم من شوف عينه ومرقدها
عسى الله يعوّض مامضى بنعمة النسيان
تجدد امال(ن) مابقى الا شرايدها

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين