ياكثر ماواجه وياكثر ما اوحي
لاشك مالي بالسواليف حاجه

ماهمني ماقيل واثق بروحي
والرجل يعرف مدخله من خراجه

ماني ضعيف ولاقصارن شبوحي
مير ان طرد الهرج عيب وسماجه

والسب عيب ولايداوي جروحي
والصد هو طب الضمير وعلاجه

هذا وانا ببعض المواقف سموحي
ولا بعضها عيّ فيه انعواجه

وانا لجزلات المواقف طموحي
وقلبي على الطولات فيه اندلاجه

يومن بعض الناس كلبن نبوحي
دايم وله وسط المجالس لجاجه

عسا سرحه ماتشاوف سروحي
وعسا يجي بيني وبينه زراجه

اخير لي فرقاه خلّه يروحي
الحر مايرضا لكسرة حجاجه

لاصار نذل وفيه حسد وشحوحي
وش عاد ابيبه ما مزاجي مزاجه

والله مادانيه ماني مزوحي
والقلب مع مثله صعيب اندماجه

بغضه بقلبي ثابتن مايروحي
دام الفخر لابس على الراس تاجه

ولو قلت ابصبر غصب سدي يبوحي
حيث اني ماارغب لشوفه مواجه

يضحك معي والقلب ماهو نصوحي
لسانه حلو بالهرج والقلب صاجه


تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر