طرد الهوى - سعود الجوفان

يابوسعد جاتك حروفي تشره
وكم شرهةٍ قد انقفل دونها الباب

حيث الخوي في ذالزمن ماتسره
لا وقفةٍ تاتي من اقراب واصحاب

أبنشدك هو ليه قلبك تجره
طرد الهوى ماقد نفع رُخم واشناب

يابو سعد والارض سهلٍ وحره
مالله حداك تحط رجلك بالاتعاب

قبلك وصلت حدودها كل مره
قمت اتشرط بين شاري وجلاب

ماتنفعك مادام فيها مضره
من لا يعدل ميلها ياكل تراب

خله مع اللي حالته دوم مره
يهل دمعه من سبب ذيك الاهداب

تِركي عليه وكل يومٍ تكره
عايش حياته في همومٍ ومرتاب

ارقى ولا تاتي حراوي مقره
واعرف ترى نهاية العمر بحساب

لولاك ماجاتك حروفي تشره
ولولاك ماقد انفتح قدمها الباب

© 2024 - موقع الشعر