جف الحبر والقصيد أرسلت له منه طرد..!!

أهز عرش الشعور ويسقط الشعر حِرد
من شط بحر الخليل ومن على ساحله

بالشعر والشعر مثمر كان حر(ن) وبرد
فيه القطايف ثمار تسد فلّاح له

أشبِع بها مهجتي وأقطع لها كل جرد
وأشبِع بها جايع الصدر اللذي ناح له

وأملا شنان السنين أفكار ندّر وشرد
وأعلو لها كل رجم(ن) صرت بيّاح له

الصادره من ضمير اللي ليا حان وِرد
وردتّها للرجال اللي ما هي باحله

لو قيل بإن القصيد أحيان يأتيك سرد
أقول في هالزمن كلّ(ن) وله راحله

ولو ما يتجازى هماجه من زلاله بطرد
بنشوف لو شيف شاعر جاب نبّاح له

في مسابقات المجامل وإختيارات نرد
ضاعت مفاهيم نقّاده وهي ضاحله

حتّى الصحافه شلاليّات جمله وفرد
جمهورها صفّق لشاعر ماهو ارتاح له

تغيّر المحتوى والمال يقلبك عرد
لو ما إنت قادر تغوص وفكرتك قاحله

والاّ زبون الفرايد مثل قطّاف ورد
ذبلت وروده ، وعوّد ما حد(ن) شاح له

وجف الحبر والقصيد أرسلت له منه طرد
كتبت فيه الشعور وكنت نصَّاح له