سهيل

لـ ، ، في غير مُحدد

ياهل الحرار اللي تعشق الصقاره
ياللي تعدون الليالي المقابيل
اليوم كلن يعتني في وجاره
ويصف من حوله دلال ومعاميل
تباشروا بسهيل دار بمداره
تباشروا به بينكم يارجاجيل
نجمٍ يجينا كل عام بزياره
اليوم كلن يرقبه دون دربيل
عقبه يدارجنا النهار بقصاره
نونس براده مع نسيم آخر الليل
يطيب للصقار عقب الحراره
تجهيز جيبه بين صلِّح وتبديل
ويطيب للصقار باول نهاره
جذب الحرار اللي تبي زود تدهيل
يالله بنوٍ ممطرٍ في غزاره
الماطر اللي ضربه ينوِّخ الحيل
من التريبي لا شمال ام عماره
تفرح به العربان من قوَّة السيل
عقبه نشوف الروض زاهي بخضاره
رويان من كثر الندى والهماليل
يازين مقناصٍ طويل إنتظاره
في خايعٍ مابه شبوك ودراكيل
أمد شوفي ماترده زباره
مدٍ خلي والقاع قفر ومداهيل
أقنص بقرناسٍ براسه نعاره
أحمر ظهر وافي من الراس لا الذيل
ماهمني اشقر وش ابغي بشقاره
ماهمني الا طير زين التماثيل
متنومس بعزام شيخ الصداره
طيرٍ منومسني ولا اسمع به القيل
طيرٍ ليامن جيت لا ذي حباره
تل ولحقها كنها له تساهيل
يردَّها لو هي سبوق بشطاره
ويلعب بها لعب الهوى بالمناديل
من ضربته مايذبح الا بعزاره
كاسب رهاني فيه جيلٍ بعد جيل
في مذبح حباراه ناتي مزاره
وتزين من فعله جميع الأقاويل
الكل منّا لاهيٍ عن دياره
بعيد من جو الغثا والبهاذيل
نجلس على ضوٍ تطاير شراره
يدور فيها البن الاشقر مع الهيل
وسوالفٍ مابين جد وعياره
على وجارٍمابه إلا مشاكيل
هذا الغنى يامدورين التجاره
كسب المراجل من خيار المحاصيل
هنيكم ياهل القنص والصقاره
اليوم موعدنا مع نجمة سهيل

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر