فرحة وطن

لـ دهن العود، ، في الوطنيات، آخر تحديث

فرحة وطن - دهن العود

يا بلادي لك صباح(ن) ما احد(ن) غيرك حضيبه
غاليه والله بلادي ... من يجاريها بغلاها

من شماله لي جنوبه يمتلي حب(ن) شعيبه
ومن شروقه لي غروبه فرحة(ن) عمة صداها

كل عام(ن) وانتي اعلى ابرضاهم أو غصيبه
كل عام(ن) وانتي اغلى يا بعد كل من وطاها

الشعور اكبر واكبر من قصيدي يا الصليبه
تعجز ابيات القصيدة عن مشاعرنا لولاها

مملكتنا يا بختنا مملكة مكه وطيبه
و ( ابو فهد ) اللي حكمها هو ضياها هو ذراها

والسعودي شعب مخلص حبه العالم دريبه
يعشق ارضه من نخاعه يرخص بروحه فداها

دام عزك يا وطنا والفرح دايم نصيبه
فرحتك ما هيب يوم(ن) فرحتك عمر وبداها

اشرقت شمسه ولا به بعد اشراقه مغيبه
يا عسى عمرك مديد ويا عسى نكسب رضاها

ذكرى امجاد(ن) عريقة كل من جا ينتخيبه
قصته قصة عجيب قصته كل(ن) رواها

لو نسينا كيف كانت ما نسينا من سريبه
يرحم الله والدينه ( اخو نوره ) اللي بناها

جاها ساري ما تحالى النوم عينه ولا رضيبه
عازم(ن) جازم يرجّع عز جده مع غناها

جاي من ارض الكويت لأرض نجد اللي صويبه
اعتزى بنوره وصوت(اخو نوره)هو دواها

دك حصنه ثم ثور ولا بعد شي(ن) يريبه
باقي(ن) رمحه علامه ما رمى الله رماها

بعدها جات المداين دون حرب(ن) ينحكيبه
جت تقدم لأبو تركي طاعة(ن) كل(ن) حكاها

شرقها والغرب سلم يوم سير هالكتيبه
والجنوب ارخت هدبها والشمال اهدت صباها

ارسى دولتنا العظيمه واصبحت دولة مهيبه
وصارت البيعة ل آل سعود من رب(ن) براها

نسله اللي حاكمينا غيرهم ما نعتزيبه
ياعسى ملوك(ن) توفوا في الجنان اعلى سماها

ما عشقت الا ثلاثة في حياتي هالرحيبه
ضحكت امي والقصيدة وارضك بلادي معاها

وما كرهت الا ثلاثة في حياتي هالكئيبه
غيبة اهلي والقطعية وخاين(ن) يطعن حشاها

غاليه يا مملكتنا و جعل من خانك حسيبه
رب(ن) اعلم بالخفايا حامي(ن) حتى هواها

ايه احبك يا بلادي دون شك ودون ريبه
حبك اللي في فؤادي يسري بعروقي دفاها

مرخصين الروح لجلك مرخصين ومو غريبه
من يلام بحب امه امنا وحنا ضناها

برنا فيها ندافع عن ثراها بالحريبة
وحق ابو فهد(ن) علينا طاعته لو في فلاها

نحمد اللي خصنا بالامن في ظروف(ن)عصيبه
غيرنا امنه تزعزع والبكا اصبح قضاها

حقنا يا مملكتنا نفتخربك يا العريبه
وكل واحد في وطنا حق من حقه يتباها

حبك اللي في الحنايا يلتويبي والتويبه
نعشقك نعشق هواكي ونعشق ارضك مع ثراها

من عدم كنت وبنتي وصرتي واصبحتي عجيبه
درة(ن) في الكون والله ما حد(ن) جد وقواها

بيرق اخضر فيه عزه وكلمة التوحيد هيبه
وسيف(ن) مسلط على اللي يسعى دايم في غثاها

يا بلادي يا بلادي غيرك انتي ويش ابيبه
انتي ارضي انتي عرضي انتي من اعشق حماها

كل دقات ن) بقلبي تعترف لك مو صعيبة
انك انتي وحدك اللي يعتصر قلبي شقاها

هذي انتي يا بلادي ما تهزك أي مصيبه
تعتلي بافعال شعبك كالسحابه في علاها

واللي قلته في البداية جيت اقوله وانتهيبه
كل عام(ن) يا بلادي وانتي افراحك ضواها

كل عام(ن) يا غلانا وانتي دولتنا الحبيبه
ألف مبروك(ن) علينا يوم مولدها وسناها

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر