يابوفهد دنياك هاذي مغره
دنيا مظاهر والفوايد قليله
تضحك لعوجان الدروب المكره
وتسقي نظيفين الطرق حنظليله
من عاش فيها بالجلاده تظره
دوراتها دارت وجابت حفيله
تفرح على سام الهدف بالمظره
وتجاهره بعنادها وتحبيله
دمثة ملامس والمذاويق مره
منهاخذو بعض الخلايق فصيله
سايرتها بين الغضب والمسره
بغيت قصرتها وصارت طويله
واليوم يالهرس انتهاالصبر مره
والله لواني من هل السوق اكيله
معاد باقٍ ٍ منه مثقال ذره
وانت تعرف يالمرشدي وش بديله
فاهم والك مع منهج العرف جره
الطيب فكرك والذكا ينتميله
والراي تعرف نافعه من مضره
تختار لخياره وتنفل هزيله
والرجل يعطي محكم الراي سره
والا الغشيم السر ماينبد يله
العام يوم الوقت حسيت حره
واشتقت لخيال ٍعلى البعد اخيله
احفيت رجليني وانا اتبع مجره
ولقيت سيله مادرج مع مسيله
راع المحل بعض المخايل تغره
ويلقاديرهامثل داره محيله
خيرالمقدر مومن ٍبه وشره
والاالبشرماقبل خداعه وميله
مرضاالخطامني عليه ماقره
واعرف مصيب العلم واعرف دليله
على مظيع شرهتي ماتشره
لكن ضارب لبته وش حصيله
كان اعتذر والعذر الابيض مبره
من لايضد القوم وش يعتزيله
الصبرفي رجواه قاسيت امره
لاصدرالراجي ولااخلاسبيله
واليوم جادون الشواهيق حره
حفيه ولافي ذاهبتهاعقيله
واحترت افك زرارثوبي وازره
اميل للميدان والاماميله
انص الهدف يابوفهد لا تمره
وعطني حكيم الراي منك احتريله
انااشرح الموضوع والعلم اشره
والااد محه من عرض ماشلت اشيله
ماشرتبه يالقرم مني تحره
وانت تعرف قومات مثلي ثقيله
اقرن بهقواتي نجوم المجره
والعظم ميقاع سهمي في جليله
امشي عيل واعطي من الشراشره
لياقرب خشم الزناد الفتيله
والكحل في عين المكابر نذره
من شان ما ينضح بمكره صميله
والمدح نرجع به على مستقره
اللي لهم بيض الطرايق عميله
والعذر ياللي لك على الطيب كره
ماجت على منهج اعزاتك دخيله
حاشولها من فوق مهره وحره
بايمانهم يوم السنين السحيله
واسلم واسراللي لك القيل اسره
خله يغراهل القلوب الهبيله
سعدون بن فهد الهرس
الوقت يامحماس برده وحره
وعسره وتيسيره وعد له وميله
في دبرة اللي ماخفيً يغره
اللي بحزات الكرب نلتجي له
والعلم اله يامنبع الجود غره
خل الخيال المنتحي لا تخيله
برق ٍ مصد ٍ عنك خيره وشره
تلقا بداله بارق ٍ تستخيله
واللي يكن الغيض لله دره
وسرد العلوم وكثرهاويش هيله
شرحك لموضوع ٍ يسرالمكره
مايستويلك وانت ماتستويله
صره وخله باقي ٍ في مصره
ماهوب حق مدورين الجميله
كم واحد ٍ كابد وذاق المضره
حاول بحيله يدرك المستحيله
ورجّع يداه لجيب ثوبه وقره
وده يشيل الحمل وازرا يشيله
من دون حلو الدهرحاديه مره
مال ا لزمان ولا قدريرتكيله
والدهرتياره علينا يفره
الله يجيرك ياحريب الرذيله
حيلات حلحيل الحيل ماتسره
ان كان حضه ما بردله غليله
والكون لاضاق ابك بحره وبره
اعنز على الخلاق منجي خليله
جل وعلى كيد الملا مايضره
مده ولامداليد ين البخيله
ياذخرمن ياخذعلى الخيل كره
لاجاله الصياح يومي شليله
ياركب من القب الاصايل شمره
ويروي من الفرسان سلة صقيله
ويثني ليا جا للمصاقيل صره
ويستلحق التالين يوم الدبيله
ياماثنى مرات ماهيب مره
وعج الرمك منقاد مثل المخيله
فعله دليم الطربالقيل اقره
يقول فاللّقوات يرذالاصيله
ويقول يعطي مقرعات الاصره
يصخي بها ما بين يومه وليله
ليانصاه معاني الفقرسره
يعطيه من ماله عطاياً جزيله
والضيف بكبارالفقايريبره
ماهوب مثبور ٍ يشح بحصيله
قول ٍ صحيح ولايق ٍ في مقره
عايض ولدوازع منجّي دخيله
يابن شميسان السبب ما تجره
حيثك نزيه ومن خيارالقبيله
فدوك هافين البخوت المدره
اللي علينا يوقدون الفتيله
نفسك عزيزه يابومشعل وحره
رجال عرف ولا تبالك دليله
من عزوة ٍ تدها الحريب و تضره
تدهل مداهيله بنمراً مهيله
وان جاب جمعه من دياره يجره
ناون على هدم البيوت الضليله
رايه غضيب وناصي ٍ في معره
شر ٍ عريض وعلة ٍ مستطيله
حريبها يمسي ويصبح بحره
تسبامضاهيره وجيشه وخيله
واسلم ودم ياطيب ٍ ماتغره
كل السلوم ولايجيب الهزيله

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين