بعد ما تلقيت الخبر منك يافيحان
تدالن همومي خافقي واستحلنه

بغن يذبحني مثل ذبحة بني هزان
لكن الله اللي فكني من خطرهنه

انااليوم كلي حزن من موت ابن ذيخان
عساالله يعوضه يابن سلطان بالجنه

رفيقي ولد عمي ولوكان مهماكان
حضا بالمفاخروالفرايد نقاهنه

نعده من النخبه ليا عدوا الشجعان
فقدناه يوم سهوم الاقدارصابنه

رحل من سببهن حين موعد رحيله حان
ولا ياوجودي ليتهن كان ماجنه

خسرته وخسروه الدماسين والعضيان
والاوزان وبحور التماثيل خسرنه

ثقيل ٍ ترجح وقفته كفة الميزان
حكيم ٍ محابيل العدا مايصيدنه

بعد فقد غالب منهل الشعرنقصه بان
ظواميه عقب اليوم ينقص عددهنه

ولد نجر بن غلاب والجد شانه شان
يصد المغيره والنضا يحتميهنه

خذا فالمجيديات من خيرة القطعان
عدايل هل الطولات صال وشلعهنه

تراجع خصيمه عقب زومه وهوخسران
لحس نارابن عماريوم اختلف ضنه

واله ماقف ٍ يعرف ليا عنكب الدخان
جنابه يذري والمواجيب ينصنه

هذا قول من ياخذ ويعطي على برهان
لقا الخافيات المرمسات وكشفهنه

تعبنا على التاريخ ذل ٍ من النسيان
حفظنا الحقايق والشواهد عليهنه


تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر