ياراكب من عندنا فـــوق سمبوك

ياراكب من عندنا فوق سمبوك
متوجه صوب المنامه بشايب

مع البحر كنك على القار ف بيوك
يلحق ويفهق مسرعات الهبايب

وان طحت في خفر السواحل وردوك
دارك على عود من الحول ذايب

وان باركوا لك بالسلامه وهنوك
لك في الدلاله ياابن الاجواد نايب

ترى خويك كان من قبل صعلوك
ويدل حتى موحشات الخرايب

وصحيح لو تنشد هل الدار دلوك
واهل الوفا ماعابهم ربع عايب

ويامقدرين الضيف لو مامعه بوك
باخلاقكم صارت ثمان عجايب

وارجوك انا ياصاحبي وارجع ارجوك
اياك تنسى انك مودي وجايب

رجع لنا خريج بومبي وبانكوك
وخلك على الزله بعيد الحضايب

سعد بن عبدالله العجمي
الرد

اخطوا عليك اللي بها الاسم سموك
اسمك سعد وانت السعد منك غايب

والظاهر ان اهلك على العنف ربوك
وطلعت تبحث للنشب والطلايب

وظلمت حظك مااشين الظلم يابوك
وهجيت عود عن هل الغي تايب

ماتدري اني صرت هادي ومبروك
وعلي تثني عمتي والنسايب

وان شفت ديواني على طول مصكوك
اطرد ورا حظ ورزق نهايب

وحتى انت تنغزنا مع الحكي بالشوك
ياهي علينا من كبار العقايب

ضيدان بن صبحان العجمي