عطر العيد

لـ خالد بن عبدالعزيز التميمي، ، في العتب والفراق، آخر تحديث

عطر العيد - خالد بن عبدالعزيز التميمي

يعيش راسك ياعطر ليلة العيد
وش تنتظر ماعاد للشوق ذمه

ماعادباقي للمواعيد تجديد
لملم رذاذك من ثيابي ولمه

عطري تركته في كفوف المواعيد
باقي تفاصيله على اطراف كمه

سايح من المغرب على راحة الأيد
ينطرحبيب في كفوفه يضمه

طال انتظارالصبر والياس عربيد
كسر مواعيد الغرام المهمه

والليل شاخ وغيرته التجاعيد
لملم بقاي ظلمته في معمه

وانابرجوا باقي الليل تمديد
يمكن وليف الروح وعده يتمه

يمكن يجي من زايرالشوق توكيد
واعاتبه بشويش وابكي واخمه

واقول عطري مات ياسيدالغيد
بين الكفوف الوافية سال دمه

طاح وتبدد بين الأشواق تبديد
صوته من العبرة تعثر بفمه

تعال صاب العطرغربة وتشريد
اجمع غلاك وصادق الود سمه

وان كان عشق العطر في قلبك يزيد
صافح عبيره والغلا لاتكمه

وش فايدة عطر تشمه من بعيد
رشه على راحت يدينك وشمه

خالد

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • للتواصل مع ادارة موقع الشعر إضغط هنا.
© 2020 - موقع الشعر