الصراحة

قالوا هرج بصدرك تستحي منه بدّه
وأنا بديت ما في الصدر حمله يكود

شاعر مكلماني وكل جزلن أعدّه
عندي عدّ الجزايل مثل عدّ النقود

يا سلامي على اللي كل نبّ يسدّه
ما جعل بيني وبينه دروب وسدود

من تركني فلا يطلب رضاي بعد مدّه
ومن بغاني خوّي له فيرقى سنود

والرجل لا اختلط وإياك مزحه وجدّه
اتركه خلّه يولّي عسا ما يعود

والصبر لا وصل بالصدر ياناس حدّه
فاجهر بكلمة الحق والخلايق شهود

والوفا حي من هو صاحب له وقدّه
والردى شفت من هو سار به ما يزود

شفت فعل الردى براعيه عود لضدّه
ما جزا الجحود إلا الجفا والجحود

صاحبي الوافي الشغموم يدّي بيدّه
لو غدى الوقت قاسي وصارت أيامي سود

دام بيننا الغلا مصيون وصدق المودّه
ما علي من كلام اللي حقود حسود

دام أدري أنا بودّي ويدري بودّه
فلا علينا من اللي فاشل ومعقود

صنت نفسي عن الفاشل وشوفي ألدّه
ماني على مقابل كل لاش محدود

واللي ورى الخلايق يجيب هرج ويردّه
يلعنه كل مسلم مثل لعن اليهود

وأنا حبل التواصل بكل وافي أمدّه
لين نفنى ويفنى تحت ذيك اللحود