تبادل القلوب

يأعز البشر فالحب ما يصلح التمثيل
لا تجرح شعوري خاف من ربك وْ ربي

ياليت القلوب يْجي لها بيننا تبديل
واخذ قلبك الداله وابدّله انا بْقلبي

على شان تعرف حال مغليك بالتفصيل
ومقدار حبك ياوليفي مع حبي

انت تْنام في راحه وانا اسهر طوال الليل
واتخيلك من زود الوله نايم بْجنبي

اكابد غرامٍ في خفوقي يهد الحيل
واضمّد جروحٍ سبتك ما لها طبي

هذا حال معشوقك حقيقه بلا تضليل
معاليق قلبي بين الاضلاع تشتبي

لو لْدمي اسوي في المختبر تحليل
اخشى يْبين سرٍ في خلاياه متخبي

سرٍ ما يعرف غير انا وانت في ذالجيل
غرامٍ مقدر لا بذنبك و لا ذنبي

وانا ما انكر انك فالهوى مخلص بالحيل
لكنك تعذب قلبي بْطبعك السلبي

لو تْمكيج الاعذار من باقة التجميل
ما تقنعني اعذارك و لا ينبري غُلبي

وليتك معي دايم وادللك انا تدليل
واذريك عن زيف العنا كل ما هبي

واقهويك من كيف الهوى العذب بن وْهيل
وْتبقى مدام العمر يأغلى البشر قربي