شكوى إلى أمى

لـ محمود محمد خلف، ، في الرثاء، 20

شكوى إلى أمى - محمود محمد خلف

واهو جه الوقت اللى فيه اشكيلك
وامسح دموعى فى منديلك
وانام فى حضنك الدافى
واعتذرلك على كل يوم كنت فيه جافى
ما انتى اعز شئ ليا
وانتى نهايتى ومطافى
وانتى ملاذى وقت الخوف
وانتى شطِّى وضفافى
 
 
علمتينى حاجات كتيرة
وانتى عندى الأثيرة
دى أول مرة هحكى ويمكن الآخيرة
عملتينى ابقى شامل
علمتينى ازاى اعامل
علمتينى امتى اجامل
علمتينى ديماً اكون فى حياتى آمل
 
 
لكن مقولتليش يا امى امتى اغامر
ليه يا امى مقولتليش على جرح المشاعر
يا امى ابنك اتجرح ومعدش شاعر
يا أمى ابنك حب والحب كسره وهانه
ليه مقولتليش يا امى لا دا زمن الحب ولا دا مكانه
يا امى ابنك معدش خلاص فارس زمانه
خلاص القسوة اخدت مكان حنانه
ازاى يا امى اكره حد القلب صانه !!
 
 
علمتينى ازاى يا امى اكون كويس
وازاى اكون فطين وكيِّس
وإنى اعامل الخدام على إنه ريِّس
وإن واحد + واحد مستحيل يبقو تلاته
عملتينى المشى حبه حبه تاتا تاتا
فاكرة يا امى لما كنتى بتبرَّدى ليا البطاطا
 
 
لكن ما علمتنيش يا امى أزاى اخون
وازاى يا امى افهم لغة العيون
وازاى اخلى القسوة طبعى مع إنى حنون
وازاى اعرف يا امى موسى من فرعون
وامتى يا امى ابقى خاين وامتى اصون !
 
 
ليه يا أمى مجبتليش عن الحب سيره
ليه يا أمى الامير محتاج اميره
يا أمى انا مش ضرير لكن اعمى البصيره
 
 
ليه يا امى المثير محتاج إثارة
وليه يا امى الشمس زى ما بتنور بتعلى الحراره
وليه يا امى المكسب مش زى الخسارة
وليه يا امى الفرح محتاج بشارة
وليه يا امى الحريق بيكون من شرارة
ليه يا امى فيه ناس بتعدِّ الفلوس بالشيكارة
مع إنهم هما اساس وعنوان للحقارة
وناس آخرها يومين عدس ويومين بُساره
يا امى انا رسبت فى اول حب بجدارة
ووقعت يا امى مع إن دى اول خسارة
 
 
علمتينى ازاى اعيش وسط الديابة
وازاى يا امى ابتسم فى وشوش كدابة
وازاى انافق وازاى ألعب ع الربابة
يا امى خلصت خلاص روح الدعابة
واتحولت بسمتى الصافية لحزن وكآبة
يا أمى انا اتسألت كتير وجه دورى فى الإجابة
خلاص يا امى راح للأسف زمن الصحابه
خلاص يا امى قلبى الطيب اصبح خرابة !!
 
 
علمتينى اكون حنيِّنْ
بس اتجرحت يا امى جرح بيِّنْ
خلاص يا امى انا بقيت على نفسى هيِّنْ
يا أمى 6 سنين وانا فى الطيِّن بَطَيِّنْ
اتجرحت يا امى واتقالى يحنن
واترمى حب السنين عشان يصنِّن
من عليا غير يا امى يهوّن
طول حياتى وانا بالأسود بلوّن
 
 
اتجرحت يا امى وبكل سهولة
تعبت يا امى خلاص من دور البطولة
رجعينى يا امى تانى للكَفُولَة
يا زمن خلص خلاص زمن الشباب رجعنى تانى للطفولة
رجعنى عيل يا زمان لسه سِنّهُ فى سَنه اولى
كل دا وانا لسه يدوب على اعتاب الرجولة
كنت عارف إن الزمن هيتَقَّل عليا الحموله
 
 
مكنتش احسب إن الزمن هيبقى
حجرة عثرة فى طريقى
وإن كل شخص عرفت إسمه
خلاص يبقى صديقى
وأى حد مشيت معاه بطول الطريق
يبقى رفيقى
 
 
يا امى انتى الكل لو الكل باعنى
يا امى انا لو بكيت مليش غير حضنك يساعنى
انا وقعت فى الحب يا امى والحب وجعنى
يا امى انا حكيت للكل مفيش حد سَمَعْنِى
ما هو برضوا منطقى إنى ابقى بجرحى مَعْنِى
 
 
واهو جه الوقت اللى فيه احكيلك يا امى
ما انتى امى برضوا ودمك هوه دمى
وبشبهلك يا أمى فى كل تفصيلة
دا حتى همك هوه همى
يا امى بعد ربنا بشكيلك تفكى غمى :/
 
 
© 2024 - موقع الشعر