لوجيت أبكتب قصتي..يضيع حرف القافية

لوجيت أبكتب قصتي..يضيع حرف القافية
أيامي إللي ودعن ماكنهن إلا سراب

وإن جيت أبرسم رحلتي ...الوان حزني كافية
ترسم تعابير الألم في غربتي مع العذاب

الوقت جار وهدني .. وبين أمور خافيه
لاواسفاب اللي مضى من عمري أيام الشباب

والحظ شان وضامني..وأشعل همومٍ طافيه
ماجاء على بالي الشقى ماكنت أحسب له حساب

الله ياوقت العنى... يازين طعم العافيه
فال التشاؤم لفني ينعق بدنيايه غراب

الشمس يشرق نورها ولا غفت لي غافية
محتار أنا في ذا الزمن .. وين الخطا؟!.. وين الصواب؟!

وإن جيت أبا اسأل عن سبب.. مافيه إجابه شافيه
تكثر علي الأسئلة ..لكنهن بلا جواب

عبدالرحمن عبدالله المجلي
راعي مرات