أنتي بكـــــفه وكل الناس في كفه - مسفر جمعان الصفا

يالغاليه سيرة العشاق ماثوره
والبعد ما ارخص مقام الحب والالفه

ان كانها بالغلا والحب وشعوره
انتي بكفه وكل الناس في كفه

بستان حبك بصدري تنعش زْهوره
وعلى غرامك غصون الروح ملتفه

سبحان من جمّلك بالصوت والصوره
والعقل والدين والاخلاق والعفه

شيخه ومزيونه وْدرّه وغندوره
فيك الحلا الزاهي اللي نادرٍ وصفه

إسطورةٍ بالجمال إيوالله إسطوره
وْياهني من ظم راحة كفك بْكفه

شبيهك البدر لا منّه سطع نوره
يبهر جمالك جماله لو وضع صفه

ومادام شاعرك لجلك عاملٍ ثوره
وش عذرك ان كان باسبابك لقى حتفه

عليك يسخط محبينه وجمهوره
وْياكبر خطاك لا احرمتيه من شفه

ما انتي على الصد والهجران مجبوره
تواضعي له وشوفي له معك صرفه

© 2024 - موقع الشعر