وزن وقافية - سعد الودعاني

ما يبرك عوص الافكار غير فحولها
شاعرٍ لاقال جات المعاني وافيه

لاوردها جاب منقوضها مفتولها
في غموضه من وضوحه طعونه شافيه

القصايد من بغى يقولها بيقولها
لو نظرت الشعر شطرين وزن وقافيه

جادلٍ للغير ما نقضت مجدولها
باالتغنج لااقبل الليل جتني لافيه

كل ما ضاقت علىّّ اكشفت عن لولها
وانثعت شقرٍ تلالا وراها ضافيه

بوحي لبالي صدى صوت رن حجولها
مطلع..وفكره..ومعنى..وصوره خافيه

كثر ما استوعبتها ما قدرت آطولها
وكثر ماضميتها شفت كم هي جافيه

كايده ما كل من تتعبه بينولها
ما تبي اللي يحترق في مشاعر طافيه

تبغي اللي يلوي اعناق غيره حولها
شاعرٍ لا غاب ضجة غيابه كافيه

ما ظميت الا رواني برد معسولها
من شهاليل القراح الزلال الصافيه

ياقصيدي خلها تدرج بحمولها
وان وردها اللي كفو جعل فيه العافيه

© 2024 - موقع الشعر