على وزن البيوت - عبدالله بن قنيفذ

على وزن البيوت اللي صداها يصدع الجدران
تلاحنك الضلوع اللي حوت بالصدر موجوعي

وعلى وزن البيوت اللي لها في القلب قدر وشان
تجاريك القصايد والولع بالشعر مشروعي

وعلى وزن البيوت آغيب عن وعيي وأنا ولهان
وطواريقي على الذكرى تنادي الوقت برجوعي

وعلى أوزانك تقول إن كن فيني مسة من جآن
ألا وجدي على من هو بدرب الحب مقلوعي

وعلى وزن البيوت أروى وله وإلا أنا ظميان
من اللي ماه شح ونبته الذابل سبب جوعي

وعلى وزن البيوت أسكر شعر وأصبح بها سكران
تقل كني رشفت حروفها من دفق ينبوعي

وعلى أوزانك حسبت إن كن جده في وسط نجران
أو إن كن راس تنوره غدا أقرب من طرف كوعي

وعلى أوزانك صدى الناقوس دق بعالم النسيان
وصحى فكري من السكره وفز البال مفزوعي

وعلى أوزانك وعلى أوزاني ألا بسم الله الرحمن
مكاتيب الهوى يبقى حبرها العذب مطبوعي

وعلى وزن اليتيم آحاول أنسى ذكرهم وأصتان
وقلب الشوق مهما صار لايسمع ولا يوعي

وعلى طاري "تعال إسكن " ياعايض باروا العربان
وأنا بعد الجفا قفيت عن رغبة ومن طوعي

وعلى وزنك أورد مهجتي وآصدر القيفان
وتحياتي رساله شوق منها الصوت مسموعي...*

© 2024 - موقع الشعر