حان الرحيل

لـ طلال عويض مصري، ، في العتب والفراق، 45، آخر تحديث

حان الرحيل - طلال عويض مصري

حان الرحيل اللي تردد رجوعه
بين ابيض الممكن، وسود احتماله

قنعت عن غيره ونفسي قنوعه
ما اطيبك ياقلب(ن) زهد في مجاله

فالماضية تمسح يديني دموعه
واجود من عيني دموعي بداله

واشبعه واخذ من الجوع جوعه
وابني له الواقع باوامر خياله

جيته على نشرة تغير طبوعه
على طقوس من العقل، والجهاله

حتى المحال اللي تمنى خضوعه
قبل يتمنى في يدينه سهاله

فرشت له صدر(ن) تذري ضلوعه
من يسكنه يامن ويرتاح باله

ما بين وديانه، وفيّة زروعه
ملكته الريم المكمل جماله

حرمت غيره يرتوي من نبوعه
قسمه معي يوم(ن) كلي حلاله

واليوم له كم يوم ما هي سنوعه
اللي مشينا بين صحو وثماله

ما هو هذاك اللي ولا النوع نوعه
اللي قليل الشوق منه استحاله

ولا هو اللي كل ما زاد لوعه
جيته سحاب يهتني في ظلاله

ولا هو اللي كنت أنا له ربوعه
وانا صباحه والأماسي ولياله

تغير وبدل عهدنا بطوعه
وانا الذي عاهدت ما اقطع وصاله

أخفيت عنه طعون قلبي ووجوعه
واخفيت ما يصعب علي احتماله

تقدير ماضي كل ما فيه روعه
ماضي وفيت له المحبة لحاله

كف الهوى يا قلب ذابت شموعه
ما فالهوى يا قلب شي تعنى له

عل وعسى ما كان قاسي وقوعه
مع بلسم الأيام تلقى شفا له

حان الرحيل اللي تردد رجوعه
بعد ابيض الممكن تحقق زواله

ش/ طلال عويض مصري الضريسي الهجلة المطيري
© 2024 - موقع الشعر