تسربل شعرها - سعد الودعاني

تسربل شعرها .. المسترسل .. المتساوي .. المنثور
وراحت تجمعه بيدين كن الثلج أصابعها

كثيفٍ .. فحميٍ .. متموجٍ .. متغذي .. معمور
بخوره ينتشر لاسال من شلال مفرعها

تلمه وإيتطاير فالهوى وتلف به وتدور
بعد ماحست اني من تحت لافوق أطالعها

طوته بشالها .. لين التوى الديجور بالديجور
وقّفت بس يمي إحساسها الشفاف رجّعها

عنودٍ .. روحها من مسك .. وإلا شكلها من حور
تحس أن الحسن عن وصف بنت الأرض طلّعها

تكامل وجهها البدري .. عبيره بالدلال يفور
تشاربه النعومه .. والعسل والملح ما أشبعها

ربيعي الملامح .. شارقٍ .. من فتنته ممطور
عليه من الشفق مسحه وسحرٍ مايودعها

وبين رموشها .. دعجٍ .. بدون إيسلهمن افتور
وساعٍ .. خرس .. نجلٍ .. ذايبه .. حورٍ مدامعها

وتوتٍ .. ضم حبات البرد .. له هيئة المسرور
وليا منه تبسّم .. كن حب اللول رصّعها

رقيق العنق كنه لاشهر من .. ما .. الذهب مشقور
نجومه .. حاول الشال وعجز يمنع تناصعها

طليق .. أطرق .. متنزي .. متفرد .. مشبور
على شرب العطر ماخذ مثل مرهف مسامعها

نحرها .. أنفصخ من شمعه الأبيض .. وهو مستور
كأنه .. من ورا المخمل تفلت لين ولعها

توهّج به .. مرايا .. وسطها جمرٍ شعق مقهور
ووسطه .. دهن عودٍ فاح يعكس طيب منبعها

تلامع برق .. (لبّتها) .. وحوله غيم من بلور
وحوله شمس من ياقوت رايقةٍ تلامعها

بعضها في بعضها لاتداخل سال منها نور
عليه الما .. يشع ويفترق فيها ويجمعها

بياضٍ .. في حمارٍ .. في شقارٍ .. والصدر مزرور
تكاشف بين أزريتها خليطٍ شكل اروعها

رفيعٍ .. نابيٍ .. متشهلٍ .. متغطرس .. مغرور
كأنه لامشت والا .. اوقفت يمنع تواضعها

عليها .. فارعٍ منه .. ايتفتح للنعيم زهور
طغت فيه الطراوه وأسفرت في طول فارعها

ليا منّه تثنى مايخلي الريح تشهد زور
تعاطفها .. يشاور للهوى ويروح يتبعها

جداول من ليونه .. تنتهيه وتغرقه .. وتجور
عليه .. وتلتوي به .. لاتمايل من تهزعها

نحيلٍ .. راويٍ .. ضامر .. دقيقٍ .. مستوي .. مفزور
نحيفٍ .. أهيفٍ .. متفهقٍ .. كنه مهو معها

ليا قامت تحس انه على القومه ماهو مجبور
وإيلا منها أجلست كنَه على القومه ينازعها

ليا منه انتصب من كثر مايشرب ضماه غرور
تفتّاله على اللي حولها بالتيه يرفعها

وإيلا من دنّقت .. ينساب ما ورده .. إيلين الزور
ويبرق خدّها لامن تدلاّ .. بعض برقعها

مذارعها .. حريرٍ .. ناصعٍ .. يلعب بياضه دور
ليا من خانها .. (الكم) وفضح طارف مذارعها

سخافٍ .. مرهفاتٍ .. ناعمات .. إصغيرات شبور
ضبايبها .. شفافه .. هبوب الريح .. توجعها

ومبروم .. ورا .. الفتحه .. شروق بالفتن مخشور
طريٍ .. مدمجٍ .. رنهة كعبه اتشد مسامعها

بديع .. ماسيٍ .. ساطع .. رشيقٍ .. ممتلي .. ممهور
مابين الدق والجل اعتدل واندار يانعها

عليه التف سحرٍ لمعته فيها الندى مغمور
يلم الطل فيه .. وفيه بعض أشيا يوزعها

فريده .. فارقه .. متناسقه .. فيها الجمال جذور
تناما .. واستوى فيها الحلا من طيب مرضعها

خياليه .. ثقيله .. شاعره .. هرجها غندور
ليا من سولفت كن النحل وده يقاطعها

طويله .. غانيه .. غيدا .. الكبر في راسها مذخور
فنجها .. والترف .. والجاه .. والتاريخ .. دلعها

عليها .. هيمنة .. ماتلتفت حتى بشخل الحور
ولكن الغلا بيدي .. شوي شوي طوّعها

بعد ماعوّدت .. قلت أجلسي .. ردت بدون شعور
أنا وياك فينا حاجة الله يقطعها

ليا قفّا حدانا .. عوّد بسرعه وهو مذعور
وإلا منا اجتمعنا كل حاجه انتوقعها

ومدت كفّها! قلت الأكيد اني انا معذور
واخذت الكف! قلت انتيي .. هنا ورده ..وازرعها

تجلّت وأهمست .. أخجلتني .. في كلمتك .. مشكور
ومثلك شاعرٍ محبوبته ماهوب يخدعها

تنادمنا الغرام .. وشدّنا .. رومنسي الديكور
وراح الليل .. مره تقول الشعر .. ومرّه أسمّعها

© 2024 - موقع الشعر