قصيده من الشاعر/عبدالعزيزجميل الى الخال/ حسن وردي.

لـ ، ، في المدح والافتخار، آخر تحديث :

المنسابة: قصيده من الشاعر/ عبدالعزيزبن جميل موجهه للخال/ حسن بن امين بن محمد العلي وردي.

قصيدة عبدالعزيز/
 خالي حسن لزّم عليه وجيته
 في مزرعة وايل عسى الخلد مثواه
 معروف ابوفهمي ومعروف بيته
 وتبوك واهل تبوك تعرف سجاياه
 شيخ ٍ يسر العين لنك نصيته
 ما تسمع الا قول حياه حياه
 حسن امين اطيب من الطيب صيته
 ذرب الجدود اللي على العز ممشاه
 شيخ ٍ العلي لني بشعري طريته
 يزيد شعري فخر لا جبت طرياه
 عقب صقور اذا حداهم لفيته
 تلقى عليه رسوم خالي وحلياه
 الكل منهم يسعدك لا نصيته
 على طريق الخير فعله ومسعاه
 ومهما مدحت الخال لا ما وفيته
 يحتار شعري كيف يوصف مزاياه
 لكن سألت اللي خلقنا ورجيته
 يطول في عمره وبالخير يجزاه
 وصلاة ربي اعداد من زار بيته
 على شفيع الخلق في يوم نلقاه
 الرد /
 عزمّك ابوفهمي وليلك سريته
 متعني من الوجه من شان لقياه
 نعتك موقع في تبوك وغشيته
 في مزرعة من خلده فعل يمناه
 وايل ووايل ما مسحت وقريته
 اسمه وباقي في خفوقي ولا انساه
 من عرفتي له ثابت ولا محيته
 ويظل به عايش ولا يمكن امحاه
 وايل حسن يا كم بشعري نعيته
 كتبت به من دمع عيني لفقداه
 واخفيت ما كني بشعري رثيته
 من شان لا ازعل كم مخلوق يقراه
 ذكرتني به رغم انا ما نسيته
 طول السنين اللي تعدت بذكراه
 رجال طيِبه يعجبك لا نخيته
 له وقفة ٍ في كل فعل ٍ تبناه
 نطلبك يا رب ٍ رحيم ٍ خذيته
 تعيضه الفردوس يا ربنا الله
 وبمزرعته مقيل ابوه ومبيته
 من حب فيه ومن معزته ورضاه
 استقبلك فيها الكريم ورايته
 طلق الحجاجين ابيض الوجه والجاه
 مقابلة خيّر بجوده لقيته
 يضحك حجاجه قبل يضحك محياه
 قدم لك الواجب مثل ما هقيته
 ما كنه الاّ ببيته اللي عرفناه
 مثل الجدي من شهرته مهتديته
 ناس ٍ بعضهم من على سمعته جاه
 في موقعه جود وكرم معتليته
 ثابت فخر شامخ على العز مبناه
 شامخ شموخ الحيد لنك حليته
 من طيب خالي عزنا لا عدمناه
 طيب امتنوع واظلمه لو حصيته
 او جيت ابحصي شي مما لحقناه
 مقدر من اللي شفته وما وحيته
 اكيد ابنسى شي والا اتعداه
 والشعر في شخصيته لا دعيته
 جاني كما طير ٍ وراعيه ناداه
 عجل وجزل ولجزلته ما نويته
 شعر ٍ قوي شعر ٍجميل ٍ بمعناه
 يليق به واستمتع اليا نشيته
 مدح وثناء بشيخ ٍ ونص ٍ مقفاه
 في كم طريق ٍ لا طرقته مشيته
 القى مااذكر به مكارم عطاياه
 مواقفه مع كل ريع ٍ بديته
 ابيض وجه فعله تعلا وعلاه
 حتى مع الضلع الطويل ان رقيته
 لا بد مالقى له اثر فوق متناه
 هذا وانا لا قلت قول احتميته
 علاقته ما ببن حكام وقضاه
 كبيروبشعري ابد ما عطيته
 حقه وله فعل ٍ يعدونه رواه
 ويابوشهير اتبعت قاف ٍ بنيته
 يعيش ابوفهمي لنا وتسلم ابناه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين