اعزي السلمان - نظر بنت فواز

سلّم على السلمان راس الحمايل
وخص السلام لبنت شيخ الحموله
اخص امل بالذات وارسل رسايل
تذبح خفوق اللي ثقالٍ حموله
في فقد ابو خالد رفيع الشمايل
شيخ العرب راس الكرم والرجوله
ماقول من صفوة كبار القبايل
يسوى القبايل فالجزيره اقوله
حاتم جلاجل مايبي له دلايل
بابه وقصره مايبي له دلوله
الجود جود الحاتمي والفعايل
تبطي الشيوخ الطايله لاتطوله
نسل القروم امكملين الجمايل
دواسر جلاجل ونعم الحموله
من لابةٍ يفخر بها كل طايل
دواسر جلاجل رجالٍ ودوله
تاريخهم كسب الثنا والنفايل
الطيب والطنخه والسطر والبطوله
الشيخ عبدالله كريم الخصايل
الشيخ عبدالله كريمه فعوله
ستر العذارا ناقضات الجدايل
ريف اليتاما غيث نفس ٍ خجوله
ظل الضعوف امن اللهب والقوايل
ديم العطاشا ديم دايم هطوله
زبن الدخيل امن الدهر والهوايل
جبر الكسير وطب ناس امْعلوله
الشيخ عبدالله سِمّي الفضايل
عساه فالجنه بجانب رسوله
والله لو يرجع بذرف الهمايل
هليت دمعي لين تنشف سيوله
ووالله لو للموت عَدْل وبدايل
تروح روحي فدوة ٍ له عجوله
ووالله لو للموت حيله وحايل
حطيت روحي قبل يدني حلوله
الموت حق وكل هالخلق زايل
ومكتوب ومقدّر علينا حصوله
و يالله طلبتك ياعظيم المثايل
تسقي ثرا قبره وتكْرِم نزوله
عساه فالفردوس الاعلى نزايل
الانبيا بجانب محمد رسوله
وجبت القصايد موجعات ٍ جزايل
وآسرجت من حزن الحنايا خيوله
اعزي السلمان راس الحمايل
في فقد ابوخالد كبير الحموله

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2022 - موقع الشعر