جابتني الصدفة

بعد السّلام وقبل تبرى طعوني
سقت القوافي مثل سوق الرّكايب

واحساسي الثّوري يزيد بجنوني
لين انفجر صمّام حكر المصايب

يا صاحبي بالله هاجت شجوني
من ما قريت وجيت عندي طلايب

جابتني الصّدفه و قلت اتركوني
وايعزت للهاجوس صفّ الكتايب

لا شكّ هذا المود واللون لوني
والشّاعر الرّطبي ليا غاب جايب

يا كثرهم كثراه ناس اخذلوني
أجناب ي ابن النّاس وايضاً قرايب

ناهيك عن أبناء عمّ آ وهجوني
لنّي حشمت النّفس تغتاب غايب

ما يدرو انّي فوق والدّون دوني
والعنصريّه ساس بغض وحرايب

عمرينهم والله لا يفهموني
بصدورهم شبّيت قافي لهايب

علّمتهم وشلون هالكون كوني
ومن طنختي شقّيت صدر السّحايب

بافكاري اللي ما تخيّب ظنوني
أقدر أسوّي لا بغيت العجايب

واثخنت فيهم لين ما عاد جوني
واغناني الله عن سواهم حبايب

أسكنتهم يا صاح داخل عيوني
واجيهم من اقصاي قبل النّوايب