بيع الردي ببلاش - ماجد بن رتيق

من سالفة عمري تعلمت انا شوي
 
واخذت من جزل العلوم الوسيعه
 
 
من بطنها الدنيا ظَهَر كل مخفيّ
 
شيَّ ب اذيع و شي ما اقدر اذيعه
 
 
من أوّل ايامي و انا اصيب واخطيّ
 
ومن بعد ما عمري تعَدّى ربيعه
 
 
فيها فهمت ان البشر حيّ مع حيّ
 
روحً شرار وروح منقى وديعه
 
 
روحً هماج وروحً أعذب من الميّ
 
روحً عَبُوس وروح تَرفَهْ مطيعه
 
 
أرواح لكن تختلف ذيّ عَن ذيّ
 
ذا يشبهه هذا وهذا تبيعه
 
 
أحدً إلا شفته أبد ما تدانيّ
 
كرْهَهْ من الله للمفارق ذريعه
 
 
ما يتبعك أو تتبعه لو توافيّ
 
وان صادفك جات الخطاوي سريعه
 
 
وأحدً ولا له بالبشر يشبه و زَيّ
 
تبذل له الغالي و ما تستطيعه
 
 
أحدً يجي فوق المعالي معاليّ
 
واحدً تجي دنياه وحل و خميعه
 
 
ذا ضيغمي لكنّ ذا دايم هْفَيّ
 
وهذا من اطياب النفوس الرفيعه
 
 
هذا تشُوفه كل علمه سماويّ
 
والآخر اوصافه دنوّ و وضيعه
 
 
أشباه واشكال ومظاهر وأساميّ
 
كلّن له سلوم و علوم و طبيعه
 
 
بعض البشر منهم لنا الله يكفيّ
 
أوصافهم بين المعاني شنيعه
 
 
أحذر تجي مرباعهم يوم يا خَيّ
 
بَحّك عن اللي جود علمه شفيعه
 
 
واحرص على راع التقى خلّه وخَيّ
 
واللي عصى ربه أبد لا تطيعه
 
 
واحذر من اللي يلحق الصوت بالغي
 
و اللي يلوُق المعرفة بالخديعه
 
 
ومن لا يعدّك شيّ عدّه ولا شي
 
واللي وفاك اصحى أبد لا تبيعه
 
 
واللي شراك و خوّته شمسها فَيّ
 
شلّع به العَليا و كن بالطليعه
 
 
أرقى سنود ودنيتك كن لها ضَيّ
 
بيع الردي ببلاش يالقَرم بيعه
 
 
ماجد بن رتيق

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2022 - موقع الشعر