هذا هو رتيق

لـ ماجد بن رتيق، ، في المدح والافتخار، آخر تحديث

هذا هو رتيق - ماجد بن رتيق

يامن جهلت(رتيق )نشد عن (رتيق)
معذور لنك جاهلن بالنوادر

(رتيق) تعني من رقى روسه طويق
واستوطنه واردم سفوحه بنادر

وامطر على باقي شعابه زماليق
وازهر جوانيبه وكل المحادر

(رتيق) عنوان الفحول المطاليق
محزم سنام السيل إلا جاك هادر

متوشحه(ناصر ) عقيد العماليق
راعي ثليم أندر من أيّات نادر

نبقه(قصيّر)طالها اعلى الشواهيق
حلالها وان عوسفت من يبادر

حلحيلها عقود الصعاب المفاتيق
ضيغم نقا يسطو على كل غادر

من لابةً دولة ..... تهجّ الغواليق
ترثة نوادر بين وارد وصادر

من (مملكة قحطان) للطيب توثيق
متميّزن ب (سحيمها والجحادر)

جَدّي وافاخر واشعط الشمس وآويق
واشوف نفسي فيه والطيب ابادر

وافتح من اعماقي لفكري صناديق
و اتأمله فيني ولا اقدر أغادر

واحيا بروح(رتيق)واصحاه وآفيق
واستشعره فيني مع الدم حادر

ثم استكِنّ(رتيق) واغفى مع(رتيق)
من صورته تخلف جميع النودر

ماجد بن صالح بن عبدالعزيز بن ناصر(رتيق) آل صبر
© 2024 - موقع الشعر