ياللي تبا تدعم قصيد الجماعه

‏ياللي تبا تدعم قصيد الجماعه
بحسابك اللي في تويتر فتحته

الوصل بعض احيان مثل القطاعه
وان كان ماتفهم كلامي شرحته

ان كان عندك معرفه واستطاعه
أسم الوفا ماينمسح لو مسحته

وان كان كنزك غير كنز القناعه
قدمك بحر لو تعتزي ماسبحته

ما وهّق الانسان غير اندفاعه
فيه العجاله طبع مهما نصحته

جسر النجاح اللي طويل ارتفاعه
يرثعبه المطفوق ويطيح تحته

خذها نصيحه واعتبرها بضاعه
في سوق لو تعمل بربحه ربحته

الطيب مثل الزاد وقت المجاعه
والكبر يعكسلك سرابٍ لمحته

والاحترام اللي من اجل الشفاعه
مثل الربا بالمال يهلكّ سحته

واللي يميّز بين شبره وباعه
مثل الجبل ماتقدره لو نطحته

من قال للشيطان سمعاّ وطاعه
يخسر لو المكسب عليه اقترحته

وان كان شق الثوب زاد اتّساعه
اللي سترته في يدينك فضحته