وجدي وجود مخلص الديـن بالديـن - زيد بن فيحان الكريزي

وجدي وجود مخلص الدين بالدين
يبغى الوفاء وأصبح مدان ٍ زياده

أبا أتمنى وأرفع الصوت صوتين
لو التمني نقص مدري نقاده

الله على شرشوح ذود ٍ ملاوين
أنا أشهد إنه رغبتي والسعاده

هزع ٍ عراقيبه ودعج العرانين
رثم ٍ مناعفها بياض وسواده

روس الوبر مثل الحلق نص دورين
وخدودها صورة مصاحف عباده

وشعافها دور ٍ عليها زمانين
ورقابها تزهى الجرس والقلاده

وبعيرها عنه أشكل البدو دارين
معامقه تحسب ويحسب هداده

أدعج حرش لهاف برص البراجين
لحيه ورى الشبرين شيرٍ زياده

مانسبوه مسمنين الطلايين
ولاطب جدر العير يهبد قراده

أقصى مداهيله حثاث ودغانين
وأدناه مابين الجبل والحماده

ومصيافه الطارف شمالي حضنين
ومشاربه حد السهل من سواده

مع سرب زعجولٍ ليا أوحى الغياطين
تلافتن عجلات مامن ركاده

هن الفخر عزوة طوال الذراعين
كم واحدٍ ينسى الحياة وجواده

من دونهن تسلم خزاة الشياطين
لا لحق راعيهن صعيبٍ عناده

يدجر مثل قطنان يوم أقسم الدين
على عقيد القوم شيخ القياده

مثله وغيره في القبائل شجيعين
في الشرق الأوسط داخله واِمتداده

فيهم دجر مسلط زعيم الرباعين
دومة مهذب شالها في فواده

عدو الدجر من دون شول ٍ ملاوين
عز الأمير اللي قديم ٍ شداده

ماهيب مثل مدلبسات الرعامين
زهادة ٍ يابينها من زهاده

حدب الظهور ويابسات القحانين
اللي نفسها لون روح الجراده

نفس ٍ ضعيفة من منول وذلحين
كار العجوز اللي عليها صماده

ماعاد أصدق مادح الشاه مسكين
طماعة الحصني وشوك الكداده

ألا ليا قال إقلطوا يالمحيين
وقدم مفطحها سواة الوساده

ماغيرها شيءٍ بعده من الزين
لافتحت الصفحة شرحت الأفاده

تندى المناخر والمواطي سكاكين
والخشم كنك داعسه في رماده

بغيت أجي شاوي وأجاور هل الضين
وأثر الغنم ماغيرهم وقراده

تمت بجاه الله رب المصلين
اللي له التقوى وحسن العباده

© 2024 - موقع الشعر