يالجتي لجـة الشـول المصاغيـر - زيد بن فيحان الكريزي

يالجتي لجة الشول المصاغير
شول ٍ نحاوي وردت عنه حيرانه

في كفخة الوسم ضار ٍ بالمحادير
مع درب عود ٍ تخض القفر فرقانه

مع أول البدو في طرد المخاضير
ماقط حلت على المرحان ذيدانه

عساسها للمطر شيخ المظاهير
كل ٍ نشد عن هواه ووجهة أضعانه

قود ضعنهم على وصواصة الطير
يبغى الذي تنبت الربله بجيانه

في عثعث ٍ لأشتبك نبت النواوير
تلقى اليهق فوق سنفانه ومكنانه

وحالت على العود عجلات المقادير
وعلى الابل والأهل ياكبر فقدانه

ياعزتي عن حنازيب الخواوير
هجف ٍ حراجيج عقب العود منهانه

بنات هرش ٍ حشى ماغيره بعير
كل البدو تقتلب وتدور إخوانه

عقب الطنف والشحم مثل الشناكير
من شافهن كظت العبره بحنكانه

توارثوهن خناطير خراخير
والكل منهم تلى الحرمة لعمانه

© 2024 - موقع الشعر