اذكرني بخير

لـ جامع عبدالرحمن، ، في غير مُحدد، آخر تحديث

اذكرني بخير - جامع عبدالرحمن

يا صاحبي لو عليك اخطي تحمّلني
اذكرني بخير لا تذكر عذاريبي

الرفقه اللّي بمبداها تعاملني
ما والله تهون و انا ما اعلم الغيبي

انا بشر و الظروف اكيد تشملني
واعوّد احيان ما احصّل مطاليبي

لا ضاق صدري ما اشوف اللي مقابلني
واذا انّي مسافر اقحص عن معازيبي

على الحزن طاري الفرقا يصمّلني
يا ما اصعب الفقد كنّة سطوة عتيبي

فقدت لي ربع ذكراهم تزاولني
و فقدت لي شيخةٍ بين الرعابيبي

لكن ليا حدّتك بقعا لا تمهلني
الاّ اعتبرني ظروف الوقت في جيبي

يالله مع اهل الجميل انّك تجمّلني
و الا انّي اموت قبل اترك مواجيبي

و الشعر عنده ماني ناقص يكمّلني
و البيت ينقص بلا فكره و تركيبي

ما ودّي ان القصيد اللّي يوصّلني
ودّي انّي اوصل قلوب النّاس من طيبي

© 2024 - موقع الشعر