راس جسّاس

دام الشعر بين المعاليق خيّم
وذود المعاني سارح بكل هوجاس

وغيم الجزالة في سما القلب غيّم
ويمطر جزايل تحيي الأرض والناس

لا هان راسٍ بالمراجل متيّم
عشقه هلا وابشر وفزعة ونوماس

ومن شيّم العربان يبقى مشيّم
ومن ضيّع الشيمة تعرّض للافلاس

واللي لفعل الناس دايم يقيّم
ليته وصل لفعولهم خاوي الراس

ما كل جرحٍ بالليال يتليّم
ولا كل من يمشي على الأرض عسّاس

قالوا سليم ونوب قالوا سليّم
وتعدد المقصود والفعل له ساس

وإذا المصيبة زايدة يا كريّم
قالوا سببها دايم براس جسّاس

وجسّاس ضايع بالزمان ويتيّم
وحاله تقلّب كل ما هب نسناس

ودام الشعر بين المعاليق خيّم
ماني مراعي بالسما نجمة الياس