سهم حبّك

العشق بلوى وأنت ما خفت ربّك
من يوم تبلاني بتركيز الأعيان

داخل عيونك شفت نارٍ تشبّك
ولا يطفّيها سوى شوف سلطان

احترت فيك وصابني سهم حبّك
كنّي أشوف الجمر واطاه حفيان

جيتك على الموعد ولا ذقت لبّك
واقف على عد المحبّة وضميان

خلّيتني ما بين مدحك وسبّك
والقلب هذا اليوم من دون عنوان

تقبِل تقل شيءٍ بدربك نشبّك
وتقفي مثل فرحتك لا صرت كسبان

قصدك تغلّى والشعر ينكتبّك
لكن على هالوضع يا هيه خسران

بالعشق واحد بالتفاني يجبّك
ويجعلني انسى كل شيءٍ معك كان

أنا عزيز وقادر ابعد واكبّك
غيرك كثير ولا توقّف على إنسان

تكتب على الجدران (والله أحبّك)
وإذا تلاقينا تقل حيل عدوان

إن كان جرحي ما تداوى بطبّك
ابعد وغيرك مشعل الدرب ضيّان