الألفية الثالثة

لـ عبدالعزيز الحربي، ، في غير مُحدد، 1،305، آخر تحديث

الألفية الثالثة - عبدالعزيز الحربي

الالف اعيد الذكريات القديمه
واصخّر الابيات لعيون ريمه

أنا متيّم في غرام اليتيمه
اللي غلاها جمّع اجساد وقلوب

قلوب بيضان النوايا تجمّع
ووجيههم تلمع فخر ماتلمّع

أقولها خل الخلايق تسمّع
الزين ماهو غتره ومشلح وثوب

والباء بوادر حبّنا ياجماعه
تبين للوافين في ربع ساعه

بر وصله تضمد جروح القطاعه
الوصل ساس الحب والحب مطلوب

مطلوب حبٍ ماسكن حوله الزيف
ينهي معاناة العباد المواليف

ماهو خيال ولا تصوّر ولا طيف
حاضر على المكشوف مافيه عذروب

والتاء تفضّل يامحب القوافي
اقرا كلامٍ جاك من قلب وافي

إن كان عندك موهبه واحترافي
للشعر ذوق وفن واهداف واسلوب

أسلوبنا بالشعر يعكس هدفنا
واللي جهلنا لو تمعّن عرفنا

العلم يبقى واهل العلم تفنى
الادمي لو ماحضر ذكره ينوب

والثاء ثوابت فكرنا مستقره
درب ابرهه ومسيلمه مانمره

وان كان بانت للشياطين جره
أستغفر الله من هوى النفس واتوب

أتوب لك ياخالق الكون كله
من كل تقصير وخطيه وزله

أنت الذي عقد الصعيبه تحله
والغيب عندك داخل اللوح مكتوب

والجيم جتني مزنة الشعر تبرق
وبروقها عن بارق المزن تفرق

يوم استهلت بين مغرب ومشرق
زانت مع الساري طواريق ودروب

دروب طلاب المعالي تنوّع
وصدورهم رغم الرحابه تلوّع

وقتٍ صويب الراي منه يتروّع
يمسي بعقل ويصبح العقل مسلوب

والحاء حصل مع الحضاره تخلّف
كن السليم من السقيم يتسلّف

والخبل كنه بالمشاكل مكلّف
يمشي على قانون ممنوع مرغوب

مرغوب للمطفوق فعل الطفاقه
يهدي على نفسه من الشوك باقه

تلقاه خلف الناس قطاع ساقه
يكبّر الاحداث ويحش عرقوب

والخاء خروجك عن مسار الطبيعه
يرميك بدروب الضياع الشنيعه

وتجيك نكبات الليالي سريعه
ثم صرت صوب وباقي الناس في صوب

صوب الهدف ركز وفكر ودقق
لاترمي الاهداف حتى تحقق

واعرف ترا ثوب الحياه يتشقق
ترا القدر ساحب والانسان مسحوب

والدال دوّر طب جرحك وتلقاه
وان مالقيته ناج ربك مناجاه

الله مع المومن بدينه ودنياه
من وسع فضله يرحم ويغفر ذنوب

ذنوب خلق الله مايحصي عددها
إلا عليم الروح داخل جسدها

أرحم من الام الحنون بولدها
من خشيته صم الصفى عده يذوب

والذال ذكّرني مساي وتذكّرت
صبحٍ يجي لو دونه الباب سكّرت

تصفي لك الاوضاع مهما تعكّرت
اليسر عقب العسر والصبر محسوب

محسوب لك صبرٍ صبرته على الضيم
والا مصابٍ قسّم الفكر تقسيم

الاجر دافع معنوي عقب تحطيم
والله يقبل دعوة انسان مكروب

والراء رساله صادره من ضميري
للي توقّع شري وشاف خيري

موقعك بعيوني وبعيون غيري
مكروه لن ماطبت وان طبت محبوب

محبوب ياشخصٍ لياشفت مخطي
تكون له ناصح وتاخذ وتعطي

ماقلت له بدري وهيّن وتبطي
ودك تصير انسان بالنصح موهوب

والزاء زعلك بلا سبب يمكن انّه
ضغطٍ صعيبات الضروف ارفعنّه

الفكر لامن الهموم اشغلنّه
كنه عن الواقع مغطى ومحجوب

محجوب يعني منشغل في قضيّه
ركّز عليها ثم نسي البقيّه

يصارع ضغوط الحياه القويّه
هذي هي الدنيا سلامات وحروب

والسين سلّم صاحب الحق حقّه
ترا حقوق الناس هم ومشقّه

باب المشاكل جنّبه لاتطقه
من طق باب المشكله صار منكوب

منكوب واللي ناكبه فعل يمناه
ويصير مثل اللي نقل داه برداه

العبد بعض احيان هو ساس بلواه
ينهب طوال الليل والصبح منهوب

والشين شاهد في عيونك وقرر
لاتاثق بقانون ثبّت ومرر

حاول من قيود السماجه تحرر
من مد راسه للمشاعيب مشعوب

مشعوب ياراسٍ مع الخيل شقرا
لو كنت متعلّم وتكتب وتقرا

لكن تحرر وانته بحالك ادرا
تبغى تعيب العالم وكلك عيوب

والصاد صمتك عن عذاريب غيرك
معروف منك وكثّر الله خيرك

عن الفضول ابعد هواك ومسيرك
شينه تكون المهنه: مفتّش جيوب

جيوب غيرك مانت مسؤول عنها
بالله ويش اللي تبي عاد منها

اللي على الاحلام يامر وينهى
يصبح مطيه للشياطين مركوب

والضاد ضد الاهتمام التخاذل
ياباذل المجهود لاصرت باذل

دون الهدف لايكثرون العواذل
عزمك هو المضراب واهدافك حبوب

حبوب كيرم يشبهن وضع الاهداف
يصطادهن حرّيف لعبه وهدّاف

ضرب المثل معروف مع كل الاطياف
شوف المثل قدامك الان مضروب

والطاء طلع بالمجتمع راس ثعبان
متخفّي بريش الحمامه ولا بان

إلا لناسٍ عندهم علم وايمان
يدرون لكن كاس الاخيار مشروب

مشروب كاس العز يوم التحدي
من عصر بلفور وزمان التردي

الله يرحم عصر جدك وجدي
راحوا وفخ الحقد لازال منصوب

والظاء ظهور الداب عقب اختفاءه
شكّل خطوره واستفز البراءه

بالمختصر قصدي وجيه الدناءه
أعني بني لبرال هدامة الطوب

الطوب مبني فوق ساس الفضيله
لكنهم يبغون نشر الرذيله

يسعون وحقوق العذارى وسيله
والغايه الاسلام والهرج مقلوب

والعين عديت الحقيقه وباقي
حقايقٍ ما بين فاقد ولاقي

يامعزب القيفان جتك الطراقي
أكرم ضيوفٍ هاضهم بحر مسحوب

مسحوب وزن وشهرته بالجزيره
بحرٍ من بحور القصيد الغزيره

والشعر بحره ما يوافق غديره
مار الغدير اليوم للبحر منسوب

والغين غازلت الاصيله واثرها
تجبر مغازلها على قص اثرها

ولياوصلها غصب يدفع مهرها
والا يولع داخل الصدر لاهوب

لاهوب نار الشوق في صدر مشتاق
يكوي ضلوعٍ همها يحرق احراق

ماني بمتحدث عن اسرار الاعماق
الحب حلم وكاس الاحلام مسكوب

والفاء فديتك ياقصيدي ومعناي
يرحل معي في رحلتي رايح وجاي

شيكٍ لياحتجته ولنه بمخباي
محفوظ مايحتاج خزنه وحاسوب

حاسوب شيكات الرصيد الطبيعي
لاهل الذكا والطيب خادم مطيعي

ماوردوه اهل النظام الوضيعي
صنع الولي دايم وصنع البشر نوب

والقاف قلت اكتب قصيده جديده
واشرح صواديف الزمان العنيده

ألفيةٍ يالله عساها مفيده
وحبالها عن واقع الهزل مكروب

مكروب حبل الجزل عن كل هزله
ماتدخل العليا متاهات نزله

من يجلب الهزله على سوق جزله
ماهو بلا كاسب ولاهو بمكسوب

والكاف كيد النفس سبّب ذهولي
ياحضرة الحاسد واخوه الفضولي

الطيّب يكرر : تحقق وصولي
وانتم على الواتساب عضوين بقروب

بقروب والا في جميع المواقع
كثر الحسد والمهزله شي واقع

أهل الحسد لو يلبسون البراقع
ماياقف الدخّان والضو مشبوب

واللام لجّة عاشقين اللجاجه
لو عكّرت جو الحكيم ومزاجه

ماتمنع الحكمه شوية سماجه
عند الحكيم الراي لو كان مشجوب

مشجوب راي المبدعين الخيارى
في هالزمان اللي ضروفه تبارا

وقتٍ نداويّه يهاب الحبارى
فيه المخالب هابت نحور وجنوب

والميم ملينا من الراي الاخر
يروّجه حاقد وشامت وساخر

واهل السذاجه بالسذاجه تفاخر
لو دلوهم من حفرة الزيت مجذوب

مجذوب دلو الخبل من حفرة الزيت
خبلٍ لاجاه الليل جمّع سرابيت

ودك عليهم تهجم بعلبة فليت
والا يجيهم من حصى الضلع مندوب

والنون نعمه كان مانته بمديون
الدين يعمي قلب واحساس وعيون

كنك تحت حكم الرياجيل مرهون
وتعيش طول الوقت ضايق ومرعوب

مرعوب رعبٍ مايخليك ترتاح
لو كنت قدم الناس ضاحك ومزاح

كم واحدٍ شامخ كثر دينه وطاح
واظلم سماه وصار بالحلق مقضوب

والهاء همومك مالها غير ربّك
أحيان يبرا جرحك اسباب طبّك

واحيان تجرح من حبيبٍ يحبك
ترا جريح الحب مرمي ومضروب

مضروب من كف الفراق وحبيبه
راميه بسهوم الغرام العطيبه

وليانشدته قال هذا نصيبه
راع الهوى في كل الاحوال مغلوب

والواو واجب ناقف بصف مظلوم
ونواسي الايتام ونعين محروم

واعمالنا بصدورنا سر مكتوم
فعلٍ لغير الله ملغى ومشطوب

مشطوب حيث انه نفاق وسخافه
شركٍ خفي والشرك لازم نخافه

والخوف من هالشي ماهو ضعافه
خوفٍ بصملات الشجيعين مصحوب

والياء يقولون العرب مشكلتهم
جتهم عجوزٍ ساحره فرّقتهم

أعطتهم الضو الخضر واخذلتهم
واقول هذا عذر لاعب وملعوب

ملعوب والملعوب ولا زمانه
أسباب ماصاب العروبه خيانه

أعط الامر خاين تضيع الامانه
أكبر دليل القدس لازال مغصوب

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر