جليـسك :

جليسك اللي يندحر به إبليسك
ويذَكِّرك ، بحقوق ربك وناسك

الناصح النصوح خله جليسك
مثل المراية فيه تكشف دماسك

وبالصادق الصدوق إزرع غريسك
وحطه بمنطوق الوفاء تاج راسك

تلقاه ، دايم.. بالمشورة عَسيسك
ويزيد من قدرك ومن قو باسك

وإن ضقت يا هو بالمودة ونيسك
وان كنت في غفلة ايْنَبّه حواسك

ويكْبَحك ، لو انه لعب بك رويسك
ويروقك ، لحظات ثورة حماسك

ويأكل على زود الثقة بك فطيسك
ولو بان ، بك خلة.. فياهو ، لباسك

وجليسك ، اللي يسعده ، ذَود عِيسك
وإلى نخيته صار درعك وطاسك

ما هوب همِّه بس يكشف دسيسك
وان شاف لك غاية دخل بك وحاسك

وجليسك اللي عند حامي وطيسك
يوقف معك ، متوازنٍ ومْتماسك

ما هوب همة طفسة من طفيسك
وافي معك ، رغم صعوبة ، مراسك

ما هو جليسك في تويتر وفيسك
مراتٍ ، امفهي.. ومرات ماسك

لو جالسك بعض الأوادم نحيسك
لو فارقك ارفع على الفوز كاسك

يغنيك عن بعض الجليسين تيسك
قول المثل : طهر وليدك بفاسك

وان كنت ما تذخر لنفسك نفيسك
تفلس ومن ينفعك حزة فلاسك؟

تزفها ، عروستك مع عريسك
في زفِّةٍ ، مقاسها في مقاسك !!