مد النظر خلك بعيد الهقاوي

مِدّ النظر خلّك بعيد الهقاوي
كل البشر فيها عذاريب وعيوب

ترى الشفّاوه هي عذاب الشفاوي
وعِزّي لمن دوّر بالاجواد عذروب

لا تزعجك غِيِبة كثير الحكاوي
دامه من ذنوبك يبي ياخذ ذنوب

ولاتصير في كل المواقف قصاوي
ترى التجاهل بعض الاحيان مطلوب

ما يداوي الدلخ المغفّل مداوي
حتى لو الدكتور يصرفه له حبوب

والسيل يا شفته مع القاع داوي
يعطي مثال لثرثرة كل زاروب

تجنّب عيار الكلام السماوي
خلك حليم وحاور الناس باسلوب

وان شفت طيبك مع رداك متساوي
ووصلت لقضب الحلق مع مقرن الثوب

خلك عديمٍ صلف مثل النداوي
وحساب عمرك عند مولاك محسوب

عن كل خوّة ماتحشم المخاوي
اجعل غيابك غيبة الشمس بغروب

واجهم على نيّتك يامرحت ناوي
والرزق عند مدّبر الرزق مكتوب

العبد يا صكّت عليه البلاوي
يفرج له اللي فرّج احزان يعقوب