مد النظر

مِدّ النظر خلّك بعيد الهقاوي
كل البشر فيها عذاريب وعيوب

ترا الشفّاوه هي عذاب الشفاوي
عِزّي لمن دوّر بالاجواد عذروب

لا تزعل لغيبة كثير الحكاوي
يبي من ذنوبك على ذنوبه ذنوب

ولاتصير في كل المواقف قصاوي
ترا التجاهل بعض الاحيان مطلوب

ما يداوي الدلخ المغفّل مداوي
حتى لو الدكتور يصرفه له حبوب

السيل يا شفته مع القاع داوي
يعطي مثال لهزربة كل زاروب

تجنّب عيار الكلام السماوي
خلك حليم وحاور الناس باسلوب

وان شفت طيبك مع رداك متساوي
ووصلت لقضب الحلق مع مقرن الثوب

خلك عديمٍ صلف مثل النداوي
وحساب عمرك عند مولاك محسوب

وعن كل خوّة ماتحشم المخاوي
اجعل غيابك غيبة الشمس بغروب

اجهم على نيّتك يامرحت ناوي
والرزق عند مدّبر الرزق مكتوب

العبد يا صكّت عليه البلاوي
يفرج له اللي فرّج احزان يعقوب