ارحم وعجل - عواد الهران

ارحم وعجل
 
ياصاحبي ماظن قلبك قطوعي
لو إن تركت الدار وابعدت مشحاك
 
قريت خطك ثم هلّت دموعي
حيث انه التذكار من عقب فرقاك
 
وعزيل قلباً فز بين الضلوعي
متحدياً بقول ماعاد بنساك
 
ذاب بحنانك مثل ذوب الشموعي
وده يعيش العمر بالحب وياك
 
يعيش بين الناس ولحبك نزوعي
ماهمه من الناس ذولا ولا ذاك
 
تعبت من كثر العنا والطلوعي
ياصاحبي وين انت قلي وانا ارجاك
 
سألت من معطى الجواب القنوعي
لافية عنواناً ولا وين ممشاك
 
ادري كأنك قلت ماهو بطوعي
وكنك همست وقلت :لي قلب يهواك
 
ارحم وعجل يالغضي بالرجوعي
انا انتظر والعيد شوفت محياك
 
طلبت ربي وانا بحالة ركوعي
تعود لمنهو حيل بالحب يبغاك
 
عواد الهران
© 2024 - موقع الشعر