الجرح ارحم

ناقوس قلبي داخل العوج لك دق
ياللي حنايا ضلوع قلبي مصلاّك !

كل مالمحت شفايفك قلت انا حق
ياكيف جنتك وجهنمك ف شفاك ؟!

وخالك اللي بوردتينك معلق
مضناك لولا الخوف حجك ولباك !

وسنا جبين يشق ليل السما شق
سناك غيب نور نجمات الافلاك !

سق العطيّش خمرتك يالغلا سق
وخلني اموت بشفتك وارجع احياك !

خلي خفوقي من حلو ماك يورق
وتخضر اضلاعي وتنبت ضماياك !

وضم الحنايا ضمة اغيوم تبرق
واهطل على قلبي وصالك ولاماك

دربك عسير وصعب والبحر مغرق
لكن غرقك اهون من البعد ياذاك !

لو اعرف ان جرحي يحننك وترق
سلمتك الشلفا وقلتلك انا هاك !

مسموح قطع كل عروقي ولاتبق
"الجرح ارحم" من حياتي بلياك !

وفكيت لك صدري تخير به ونق
القلب قلبك والزوايا زواياك !

مجنون ليلى لو حيا عصري اشفق
بحالي وانا مجنون صبحك وليلاك !

اخايلك كل ما بي الليل دنق
واحكي شبيهك بالسما واتشاكاك

واغمض عيوني اذا الدمع رقرق
اخاف لاتنزل مع الدمع واسلاك