سودان المخابر - علي العضلي

ي صاحبي وانا حياتي تيه تيه !
.. اقوم من حفرة ضباع اليا ضباع !

بعض الرجال الله يلعن والديه !
.. ودّك تدوسه كثر ما تحسبه قاع !

والوقت وطّى الصاحي وعلّى السفيه !
.. اهل الكرم في وقتنا حفي وجياع !

والا البخيل اللي عطا يدّه كريه !
.. عايش حياته لعنبو جده متاع !

وي كم رجل الله يحوجك إليه !
.. عزّ الله انه قاصر علوم وطباع !

ي كم رحل وطى اسم جده وابيه !
.. واهله اهل شيمه واهل قدر وذراع !

و يكم رجل وقت الصمل فشّل ذويه !
.. فشل هله وقت المصامل والدفاع !

مو كل رجل اليا ضحك لك تشتريه
.. بعض الرجال اليا قست دنيتك باع

ولا كل رجلن تفشي اسرارك عليه
.. بعض الرجال .. ان قامت الهدّات ذاع

ولا كل رجل اليا تزعّل ترتضيه !
.. له الثلاث وبعدها .. قلّه وداع !

في وقت .. سودان المخابر والوجيَه !
.. صار السواد السايد بكل البقاع

صار الرجل لا شاف طيّب " يحتريه "
.. متى يبان الوجه ويطيح القناع !

لكن مانهضم حقوق البعض .. ليه !
.. لان الزمن فيه الهطيشه .. والشجاع !

ي كم رجل .. رجّال يومن تنتخيه !
.. اليا تجمّل .. ما تفيشربه وشاع !

وي كم فقير اليا نصيته .. ترتجيه !
.. مدّته تغني دهر .. ماتغنيك ساع !

وي كم رجل علّى اسم هله بيديه !
.. واهله ولا يخبرلهم حرب وقلاع !

و ي كم رجل تحسبه .. مايسوى جنيه !
.. و وقت الصمل .. صنديد من دونه رعاع !

© 2024 - موقع الشعر