هوى الذكرى - علي العضلي

سلام الله ..ياقلبي عليك .. ورحمته ورضاه !
عسا عادك كبير ولا تطيح قدرك .. الذكرى

عسا عادك .. تشوم ملاحق المقفي ولا ترجاه
رفيع النفس ماتصطاد وسط مياه .. متعكره !

وانا عارف لك ايام وعلومك بين اح واه !
لك ايام .. وعلى وجهك ملامح حزنّ ! منّكره !

و وجه المودمان كتاب مفتوح البشر تقراه !
ولو حاول يخبي الحزن في وجهه .. على فكره !

وانا لاجيت .. في ليل المئاسي ودي اتناساه
لقيت القلب في بير الهواوي يشدّ ف البكره !

يقولون العرب من غاب .. يومينن ترى تنساه
وانا اقول لخليلي حول والاعماق .. تفتكره !

ويقولون العرب ّ دوّر على غيره .. وقد تسلاه
واقول شلون انا بجبر خفوق يحب ما يكره !

على ذكراه .. دمع العين في خدّي على ذكراه
وابو عكره وماقاله .. فلا اسمع لبو عكره !

احبه ياعرب وعروق قلبي كلها تفداااه ..
واسوق بكار لعيونه .. ولا قد سقت له بكره

واحبّ عنبه وتوته .. على مطلع حمار شفاه
ولا ابغى من يفوقني اذا ذقته من السكره !

له من الجمر الاحمر .. واللظا ياوجد عيني فاه
وعينه عين شيهانن تعلى من على وكره !

انا اشهد ياعرب .. بانه على مركا الحلا مركاه
مدلع حكي والمغناج يخرب بيته آحتكره

تفارقنا الا وافوح كبدي من عنا فرقاه
وغدت كل المنافذ للوصل والقرب منسكره !

وحال الحول .. حالي حال لا حيله على جفواه
انام وصورته في بالي واصحى .. على ذكره !

اعلل نفسي ببكره عسا الذكرى .. تردّ خطاه
وعدى اليوم تلو اليوم .. لا باكر ولا بكره

والا ياقلب شوم النفس والمقفي .. فلا ترجاه
انا خابرك مايرزاك ياقلبي .. هوى الذكرى

© 2024 - موقع الشعر