كني اعرفه وكن دايم الاقيه
وكنه صديقاً من سنيناً طويله
وكني اعرفه ثم عارف خوافيه
وكنه عشيقي ولا ابغى بديله
وكنه حبيب الروح بالحيل اغليه
وكنه امل ماشفت قبله مثيله
واصبح كتاب وبالتفاصيل قاريه
كامل حروفه في خفوقي اشيله
دخل بقلبي بصمت وجدد امانيه
وسكن حياتي بين يوماً وليله
بان الوداد وزان كامل معانيه
واللي بدأ نقول واضح دليله
واليوم ياعزاه ولاتقول لي ليه
اللي بدأ ذكراه ربي كفيله
ذكرى لمن ماظنتي اليوم راجيه
ذكرى سويعات بحياتي جميله
ذكرى بها ذاب الامل مع دواعيه
وذابت بوارقها لو انها قليله
اللي انا حبيت كامل مباديه
كانت على الخفوق نسمه عليله
رحل بصمت وخافقي كان يابيه
مرحوم ياخافق غدا في مليله
رحل بصمت ودمعة العين يخفيه
يقول مجبوراً ولا من وسيله
رحل بصمت وكن عيني تراعيه
يكن بالخطوات وكني اخيله
رحل بصمت ولا امل صار لي فيه
وعند القدر ماعاد باليد حيله
رحل بصمت وجعل ربي يهنيه
مع السلامه والتحايا الجزيله
يسعد ايامه ثم يسعد لياليه
غالي عليّ قبل وبعد رحيله
عواد الهران
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.