يوم اقبلت حارت عيوني بمشيتها - احمد بن مطر الهاجري

يوم اقبلت حارت عيوني بمشيتها
مالوم من مثل حالي صار متحيّر
 
تثاقل ردوفها مع قصر خطوتها
لا شافها العود وده يرجع صغيّر
 
ام الدلع والحلا الزايد بطلتها
شمسٍ تزيح الدجا بشعاعها النيّر
 
لا وقّفت تخلف الرجال وقفتها
وتغيّر اللي هقى ماهو بمتغيّر
 
ذوايبٍ تصطفق وتموج قذلتها
والفكر من دونها ماعاد بمخيّر
 
مالوم نفسٍ تفاخت قدم سيتها
تبا تسيّر وهي ماودها تسيّر
 
النفس درهامها من دون حاجتها
درهام ذودٍ تفاخت لأم الحويّر
 
ياجاهل النفس يمتها ووجهتها
راع الهوى فالهوى مخبور ومسيّر
© 2024 - موقع الشعر