الجهراء - خالد المخيدش

نشى الغيم من غرب وترادم على الجهراء
وانا خاطري يردُم من الهمْ ماكفّاه

على صدري اللي كل صدرٍ منهْ يبرى
وإذا ضاق ! مايلقى نديمٍ يجرّ الآه

أنا أوفيت باليُسر وتناساني بعسرى
وأنا طحت ماحصّلت حتى ظلال أشباه

تراخصت فرحة خاطرٍ بِيع ، مايشرى
جلبته بسوق الطيب والسُوم ماوفّاه

وعلى كثْر ماأرخصته ! تسلّفت من بكرى
فرح يومي المجهول بعته لعين إرضاه

وتحمّلت جرحٍ ينفتق قبل لا يبرى
لأجل عين من ينخى وأنا ماقويت أنخاه

تمخْلت بي الضيقات بالليله الغبرا
وراكاني اللي لاتنادمت أنا وياه !

تضيق الضلوع وكل موجع عليّ يطرى
وأكفّ الدموع من المحاجر وأقول : فِداه

فلا تغْني الشرْههْ ولا ينفع الصبرا
على الجرح لا منّك نتلْته وجاب أقصاه

على الله تصاريف المقادير يالجهراء
نشى الغيم فيك وسال بالصدر ماكفّاه

© 2023 - موقع الشعر