قريحة الشآعر

قريحة الشاعر تترجم خفاياه
ولا كل رجال ٍ يبيح الخوافي

وإليا حصل شيٍ على البوح يحداه
يصير بالعلم القديم اختلافي

وأنا على هذا كلامي ومعناه
مبطي وانا اكنه وهالحين كافي

اليوم صدري فك سجنه وخلاه
على الجبل وإلا فجوج الفيافي

ماكل منهو دور الشي يلقاه
يمكن على التحليل يحصل خلافي

ماني مقدي واحد فكره اغداه
لا يحرم اللي مايعرف الطوافي

الرجل عزه بين راسه ويمناه
هذي عليها مسجل الاعترافي

وان كان صار الراس جلدٍ وجمهاه
على الكتوف الحدب رمي الضعافي

وإلا وطاها اللوم من قبل تاطاه
وطي الرقاب اللي وطتها الرهافي

وإلا اليمنين ان كان صارت معافاه
تجعلك من فوق النوايف تشافي

تبي تباها في فعولك مباهاه
وتحط ذكرك مثل ذكر النصافي

ضيق يمين الآدمي فعل يسراه
يكسب سمان وياصلنه اعجافي

فوق الطبيعه في نسبة محاباه
تبي على راسك تحط اللحافي

والنور يطلع لو دجى اللي غطاه
والصاعقه تقتل صويب الهرافي

مااحدٍ منع له خير كان الله اعطاه
لو هو بذل جهده يدينه نظافي

خله يريح في حياته مطاياه
هرجة لسانه ماتعدى الاشافي

الخير من رب الخلايق رجيناه
اللي منه ياتي لنا الخير وافي

اليا رضى ، غيره مانتعب على رضاه
اللي بطرقتهم خلل وانعطافي

وصلاة ربي عد وبلٍ نثر ماه
على نبي الحق بإختام قافي