مفيش فايدة - آمال محمود كحيل

مفيش فايدة
بقلم
آمال محمود كحيل
 
تمللي تلومني ، وتبالغ
في هجرك ليَّه ، وبعادك
وبتدينّني ، وبتراوغ ،
وتهزم صبري بِعنادك
عشان لامس نقاط ضعفي
وعارف إني باتسامح
ولو تظلمني ما اكرهشي
ولو كان لِاتهام جارح
وباستعطف ساعات قلبك
تبادل حبي بالحرمان
وتقسى عليه في عتابك
وتوصِمْ قلبي بالنكران
ومع إنك أكيد غلطان
بتخلَق ألف ميت برهان
وبتدوَّر على الأسباب
عشان تبعد ، وتتهرب
صارحني وقوللي مليتك
ما عادش لنفسي فيك مأْرب
وليه تسقيني كاس هجرك
وترجع تاني تتقرَّب ؟؟
هاقولك إيه عشان خاطري
بلاش تكدب ، مفيش فايدة
أنا استكفيت وضاق صبري
بلاش تنفخ في نار قايدة
باحبك لسه زي زمان
وراح تفضل حبيب عمري
ولو تهمسلي وانتي كمان
هاتصرخ لأ دموع قهري
ولو تحلف سَبَع أَيْمان
هاقولك قلبك استغنى
وكل اللي انت قلته ف يوم
وهاتقولهولي دلوقتي ،
وبكرة وبعد بكرة كمان
كلام فارغ مالوش معنى
كلام فارغ
مالوش معنى
© 2024 - موقع الشعر