وش فايدة نغمتك - مطلق القعيمة

وش فايدة نغمتك .. يا صوت جوالي
لا صار ما يرسل وْلا يتصل فيني

ماهوب والله مريح ٍ وضعك الحالي
ابطيت ما جبت لي ( رقم ٍ ) يسليني

من كثر ما افز لا دقيت طوالي
دمي خطير يْتجمد في شراييني

والله لاحطك على الصامت .. ولا ابالي
لا احاكي احد ٍ عليك وْلا يحاكيني

بس اعتذر بالظروف وكثرة اشغالي
لوشغلي الشاغل انه ما يراعيني

اشغلت بالي مع اللي مشغل ٍ بالي
واشقيت حالي ومافيني مكفيني

ودي بنسيانه وْنسيانه اشوالي
ادري بلا شك .. لكن وش ينسيني

هذاك لا قالوا الغالي .. هو الغالي
اغليه .. يغليني او ماهوب يغليني

واقول يا عاذلي : خذها من التالي
خله على كيفه .. الله منك يخليني

لو طعت فيه العرب ما كان ذا حالي
لكنَ قلبي على رايه يمشيني

ولو هي على العقل ما دزيت مرسالي
اللي عرض له على الوارد عناويني

ماعاد يفرق معي عقلي من اعقالي
يوم ابتسم لي وهو بالموت ناويني

مجنون .. واكبر دليل ٍ يثبت اهبالي
اني سنه بانتظار الغايب يْجيني

ما قمت الاعب على مركاي .. فنجالي
الا بعد ما فقدت اللي يقهويني

ان جابه الحظ والا تشهد افعالي
يحرم علي درب ٍلْغيره يوديني

يا قلب ماهي بلحية مالك ومالي
لا والله الا حريص وْلا توصيني

لو كان ماعاد اشوفه لحظه اقبالي
بابقى على طاري الذكرى .. ويكفيني

© 2022 - موقع الشعر