يا عالِم إمتى نتلاقى - آمال محمود كحيل

يا عالِم إمتى نتلاقى
بقلم
آمال محمود كحيل
 
حضنتيني ...
و شفت الدمعة في عنيكي
و فَرِّت دمعة من عيني
و نبض اللهفة في عروقي
بيتحسَّر ...
على فراقك
وليل دامس بيفصلنا
بيِبني ما بينَّا ... بخيوطه
جدار عالي
وسور شائك
ولما خطوتك بعدِت
شعرت بلوعة الغربة
لوحدي رجعت من غيرك
وصوت همسك بيشجيني
صداه بيقوللي وياكي ...
هاكون دايمًا
على الأيام
ويوم ما تحسي بالوحدة
هاجيلك حتى في الأحلام
دخلت لغرفتي الباردة
أدوَّر .. يمكن القاكي
هنا كنا
أنا وانتي
وياما سهرت وياكي
شاركتيني الفرح مدة
وجلجل ضحكنا الباكي
وعيشتيني في الجنة
وقلبي بصورتك اتحنى
قوليلي ازاي
بقى انساكي
دي نار الفرقة حراقة
وليه يا غالية سيبتيني
وسبتي عينيه مشتاقة
وودعتيني ، ومشيتي
يا عالِم .. امتى نتلاقى
يا عالم
امتى
نتلاقى
© 2024 - موقع الشعر