يعني فاضل أد إيه ؟!
بقلم
آمال محمود كحيل
يعني فاضل أد إيه ؟!
شهر ، أسبوع
أو يادوب يوم أو ساعات ؟
مش هاتفرق .. لما يبقى
قلبي متخم بالآهات
لما يبقى الماضي كله
سطر في كتاب ذكريات
واما يبقى بكرة غامض
أو مجرد أمنيات
واما أبقى ...
عايشة دلوقتي وكإني
ميتة ف عالم موات
يبقى رحمة ربي أرجى
للي عاش عمره ف سبات
يعني فاضل أد إيه ؟!
واللي فاضل
إيه هايغني ؟!
ياما لازم .. حزني قلبي
ياما ضلّ السعد دربي
ياما وعد الفرحة خانني
ياما غاب الضي عني
حاسة إني ظل شارد
وان نبض القلب بارد
وان روحي تايهة مني
وان شوقي لنوره قايد
وان حتى الخوف خاصمني
والزمن عدى وسرقني
بس فاضل حسن ظني
إن رب الكون راحمني
يعني فاضل أد إيه ؟!
مين يجاوب
ع السؤال ؟!
مين مُلِمّ بعلم غيبه ؟!
غير خالقنا - بدون جدال -
دي النهاية أمر حتمي
والحياة آيْلة لزوال
يبقى ليه نحزن ونبكي
والخلود دا شيء محال
راحة القلب ف إيمانه
باللي مكتوب ع الجبين
مهما صبري طال زمانه
فالأمل حبلي المتين
موش هادوب
في اليأس ، واغرق
أو أخاف م الموت يجيني
واما اغمض جفن عيني
النهارده ، بكره ، بعده ،
بعد بعده
أي لحظة إيه هاتفرق ؟!
المهم اقدر في حينها
بالشهادة لساني ينطق
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.