تشخيص الطبيب

فيه نوع من البشر يدبلون الطيب طيب
كل مازدنا تواضع يزيدون احترام

وفيه نوع من البشر يدبلون العيب عيب
كل ما السكه تساوت يزيدون اصتدام

وفيه نوع من البشر يلحقون الحقد ريب
كل ماتثبت براءه يجيبون اتّهام

انحراف الفكر مطلب رديين النصيب
والهدايه مطلب اللي نواياهم تمام

الشقا يضرب على منهج الحكمه صليب
والنقا مايفسده غير تحليل الحرام

لو سألنا واحدٍ يدرك الواقع يجيب
(من فقد كنز القناعه تفرغ للملام)

وان بغينا نضرب امثال للعقل النجيب
نكتفي في كلمةٍ تختصر طول الكلام:

لو نشدت القاع يمكن يقول انه شعيب
والشعيب يفكّر انه بحر حسب النظام

ياصحيبٍ تحسب حساب لحقوق الصحيب
أخذ من عندي نصيحه لها عندي مقام

كل من ينقلّك الهرج لو انه قريب
اطرده واحذر لياجاك تعطيه اهتمام

ان بغيت الراي دوّر هل الراي الصويب
وان بغيت الغش رافق خفافيش الظلام

شلة الارجاف ماعمرهم صدوا حريب
قبل بدء المعركه يعلنون الانهزام

جاك طب الجرح مرفق بتشخيص الطبيب
وانت حر بما ترى و التحيه والسلام