طبعه مايبوقي .!!

ماترك لي غير جرحٍ في خفوقي.
تزهمه ذكرى ويزعجني صديده.!!

والاّ انا.! خليت له كلي و ذوقي.
في قصيده.! ماتشابها قصيده.!!

كل ماغرد بها .. زادت حروقي.
احترق والناس تمدح في جديده.!!

راح ماودع وانا كلي شفوقي.
والرجا ... روحي تراها ماتجيده.!!

روحته تمحا قدومه في عروقي.
راح .. ماقدّر غرامي في وريده.!!

ما حشم ودي ولا دارى فتوقي.
صد مايدري عن الحزن و وعيده.!!

ماطلبت من الغلا الاّ حقوقي.
الوصل حقي .! ولا غيره نريده.!!

بالمحبه ماهقيت انه صدوقي.
لو يشب الصد في جوفي وقيده.!!

ناهبٍ قلبي .! وطبعه مايبوقي.
مانهب الاّ حلالٍ ..... ذاق كيده.!!

ذاق بعده.! والتغلي فيه عوقي.
والحزن بالجوف نيبانه حديده.!!

كان عوّد مرحبا شفي وشوقي.
وان تمنّع.! قلتها رحله سعيده.!!