قرار

قرار
بقلم
آمال محمود كحيل
 
تكرهني ، ولا تحبني
صدق ماعادش يهمني
أخلصتلك ، وندرت لك
عمري ويا ريتك صنتني
إدتني إيه غير العذاب ؟
خلتني مليت دنيتي
وقتلت جوايا الأمان
واغتلت نشوة فرحتي
قلبي اللي حبك
من سنين
لملم شتاته من جديد
ما بقاش بيحلم باللي فات
ولا عادش بيهزه الحنين
هارحل خلاص
كده من سكات
مليت سراب الأمنيات
صرح الغرام أصبح رفات
كتر العتاب إيه راح يفيد ؟
مغرور ، وقلبك من حديد
فاكر لظلمك هاستكين
ولا ابقى جارية بين إيديك
رافضاك أنا
رافضة العنا
جايز باحبك إنما
رافضة انتمائي ليك
وموش هاقبل قيود
هارحل قوام
وافضل بعيد
والضم جراح قلبي العنيد
ولا بد يوم هانساك أكيد
رغم اجتراري الذكريات
رغم الندم على حب مات
رغم الأنين رغم الدموع
هارخي الستار
واطفي الشموع
دا قرار أخير
ومافيش رجوع